الشوق ماله عمر يفنى وينعاد

الشـــوق مـــاله عمـــر يفــنى وينـعــــــاد
له في الضلوع أن عاد وأن غـاب رجفـــه



مع كل فرقــــا , له ورى الجــــفن ميـــلاد
وأن مـاتت الفرقــــا لقـى الشـوق حتفـــه



جيت أقتـل الفرقا من بـــــــلاد لــ بــــــلاد
مـلّ الطـــريق يشــــيلني فـــوق كتفـــــه



وأنا بعـــــد ملـيت من كــثر ما أرتــــــــاد
هالشـــارع اللي كــــان لك فيــه شــــرفه



تظمأ عيوني شـوفك , وتشـبع ســـــهاد
عيّـا الزمـن يقطع ظمـــاها بــ رشـــــفه



لا وجهك أسـقاها , ولا ذاقـت رقــــــــاد
ماغــير طيفك, طيفــك اللي أعرفــــــــه



كنّه ظـــبي , وعيوني ظـلال صيـــــــــاد
يجفــــل قــبل يرتد للجفــــــن طــــــــرفه



مشـــكلته أنه كل ما أشــــــتقت يـــــزداد
حـتى مـــلا جــــــدران وقــتي وســـقفـه



وأصبـحت أشوفه فــ أول الغيــم لاجـــــاد
وفــ أقصى الشفق لاطاحت الشمس خلفه



وفـي الأرض لانامت عقب صوت رعــاد
وفي كل شــباك ٍ صحـت منــه درفـــــــه



أتعـــبت طيفك لوم , واللـــوم مافـــــاد
ويوم الأمل في شــوفتك مات نصفــــــه



نويت أسـافر عنــك بجــروح ٍ جــــــداد
وعمر ٍ من أوراق الزمن حـــــان قطفـه



نويت, لكن جابني الشــــوق منقــــــاد
وجابك حنينك , والزمن ســـــال عطفه



شفتك تبـسّـــم لي خجل مدري عنــــاد
وفي نظرتك شوق ٍ من الظــلم وصفه



حسيت كني طفل , وعيونك أعيــــــاد
ياعيدي اللي له ورى الصــــدر رجفـه



سـمّ اللقـــا صدفة , وأسـمّيه ميعـــاد
أنا أنتظــــرتك , وأنت مريت صدفــه