حنا العرب .. خالد الفيصل

قصيدة الأمير / خالد الفيصل لعرب الشمال ،،


مقدمة من الشاعر :



مبدأ توزيع الثروات ماكان موجود يوم كنا حنا نقالة عود ، نقالة العود البدوي اللي يشد وينزل ، اذا خايل له سحابة شد واذا قالوا له الربيع في المكان الفلاني رحل ، لكن هالبدوي اللي يشد وينزل نقال العود ، كانت له عزة نفس كان له شرف كان له شهامة ، ماراح لأحد وقال له انا شريك لكم في ثروتكم ما قال أنا شريك لكم في نهركم ولا انا شريك لكم في قطنكم ولا أنا شريك في حقوقكم ولا انا شريك في فاكهتكم .



ما أحب اني أستعيد كل الآلام والجروح اللي مرت بنا في تلك الأيام ، ولكن كان فيه سؤال مهم يتبادر في ذهن كل انسان في ذلك الوقت .





من هم العرب ..؟



~~~~~~~~~~



حنا العـرب يــــا مدعين العروبـــة
وحنا هل التوحيد وانتم له أجنـــاب


وحنـــا شروق المجد وانتم غروبه
وحنا هل التاريخ وأنتم به أغـــراب


يوم الفقــر شلتوا عليــنا عيوبـــــه
واليوم عقب النفط جيتوا لنا أنسـاب


ويوم الفقر فينــــا البداوة سبوبه
واليوم صرتوا مثلنــا بدو واعراب


لو الهوى منكم منعتم هبوبـــــه
لا شك رزاق الملا رب الأربــاب


ولو المطر منكم منعتم صبوبـــه
لا شك رزق الخلق من عند وهـاب


جيش الحسد سقتوا علينا حروبــه
كلن يبي يزرع على جسمنــا ناب


حرب على المحسن تراهـا عقوبة
بالله عســـاكم ما تفيدون حراب


يا ما عطينــــا ما ندور مثوبه
إلا من اللي من ترجــاه ما خاب


ويا ما نصرنـا صاحب ضيقوا به
عاداتنا نقدم الى مالردى هـــاب


ويامـــا نصانا من تعثر دروبه
يدخل حمانا من تعذرة الأصحـاب


حنـــــا بنينا دارنا من طيوبه
وانتم سلبتوا داركم كل ما طــاب


الله سقانا من بحرنــــا عذوبه
وانهاركم مثل البحر هدر تنسـاب


حنا زرعنا الحب بارض خصوبه
وانتم زرعتوا كره الأجيال بتراب


وحنــا دعينا السلم نوبه ونوبـه
وانتم حمــام السلم بعتوه بغراب


يا من دعا للحرب ما درك خطوبه
لا تحسب أن الحرب تهديد وخطاب


من شب نار الحرب يصلى شبوبه
ومن ثور الفتنة تعرض للأسبـاب


ما يستر الرجــال ملبوس ثوبه
الدين وافعال الكرامــة له ثياب


ما يقبل الرجال بحمـــاه حوبه
مـــا دام له حق وللحق طلاب

يسلموووووووو